ควายไทย VS ควายญี่ปุ่น

พี่น้องเอ้ย..โลกเจริญไปหน้า คนเฮ็ดนาได้หันอ่วย

ควายเคยผูกเชือกคล้อง มันเหลือน้อยซ่ำบ่มี

ยุคเทคโน ฯ มาจ่นจี้ ทวีตื่มมาสมดุลย์

ญี่ปุ่นทำควายเหล็ก แล้วเจ็กเป็นคนค้า

เฮาชาวนาได้หันย้วย ไปหลงควายของญี่ปุ่น

ฝุ่นกอบเดียวบ่ได้ มันกินหญ้าบ่เป็น

ระวังเด้อ..ระวังควายโดดเต้น โตนถ่วนลงสระ

ให้เตรียมหาหลายพัน บาดว่าควายลงน้ำ

ควายงามๆเคยกินหญ้า สังมาลัยได้ถิ่มปล่อย

แอกคราดไถให้ย่อยๆ เขาฟันถิ่มใส่ไฟ

เศษฐกิจมาจ่นจี้ เข้ามาตื่มหลายปัญหา

การเฮ็ดนาลงทุน คิดดูแล้วมันเอ้า

คิดต่อเงินขายข้าว ได้หักทุนวุ่นเอาหนี่

จักค่าไถ ค่าสี มีชะลอมโต่งข้าว เอาเงินซื้อผ้าโต่งเขียว

เทิงค่าปู๋ยเผิ่นกะเคี่ยว เทิงค่าเกี่ยวบักดำ

แม่นเจ้าขายเฟืองนำ ฮอดบ่เทิงทุนซ่ำ

กรรมของชาวนาแท้ แวยืมแต่ ธ.ก.ส ใช้หนี้ เงินแสนห้าได้ค่าหัว

ควายญี่ปุ่นเฮ็ดให้มั่ว ได้หลงคว้าใส่ควายเกียร์

หลายแนวเสียเปลืองเงิน มาโพดเกินนอคุณป้า

เทิงน้ำมันโซล่า เทิงเหลียวหาน้ำมันเครื่อง

น้ำมันเกียร์ น้ำมันเฟือง บ่อโดนเกียร์เปลี่ยนถิ่ม สิยืนยิ้มได้จังได๋..พี่น้องเอ้ย..

ความเจริญมาแล้ว ความจนกะมาตื่ม

ยืมแต่แฮงเผิ่นใช้ หาใบแบงค์แล่นบ่ทัน

น้ำอยู่สระว่านั่น เอาไดร์ปั่นสำบายดี

ไม้คันขอเคยมี ฮอดบ่บายอยากอายหน้า

เอากระแสไฟฟ้าแทนแฮงเฮา เอาแบงค์จ่าย

สิ้นเดือนมาดิ้นตาย จักค่านั่นค่านี่ บางทีค้างฮอดค่าไฟ

ปีนลงไปคนเฮาเอ้ย ความสะเบิยพาเจ้าแค้นจ่อหล่อ

ฟืนกระแม่นแก๊ส ป.ต.ท บ่เหลียวเบิ่งไม้แห้ง แล่นหาแบงค์สิจ่อยตาย พี่น้องเอ่ย..